🇬🇧 🇱🇺

LIEST IECH WANNECHGELIFT DËST SÄIT AM DETAIL DUERCH

 

 

𓆣

 

WAT MIR WËLLEN

Mir wëlle progressiv spekulativ Fiktioun.

Dat heescht: Fantasy, Science Fiction, Urban Fantasy, Steampunk, Weird West, Solarpunk, Lunarpunk, Magic Realism, Post-apokalyptesch an nach vill méi.

Mir wëllen Experimenter an Representatioun vun ënnerrepresentéierten a marginaliséierte Gruppen. Iwwerrasch eis. Benotzt Stilmëttel, déi net oft benotzt ginn. Mir wëlle voll a ronn Figuren, déi Déiften opweisen. Mir wëllen emotional Relatiounen an eegenaarteg Welten. Mir wëlle Schéinheet a Charme a waarm Gefiller an Trauregkeet. Mir wëlle Revolutiounen an Utopien an Hoffnung, a mir wëllen Texter iwwert déi mer schwätze kënnen.

Mir encouragéieren dech vun de Normen ofzeschwäifen. Mir wëlle Geschichten, déi d’Norm briechen a Formen unhuelen, déi net Usus sinn.

 

Hei sinn e puer Beispiller:

• Jeff Vandermeer’s A Short List of Mistakes Starting with “OWL”: A Halloween Story
• P. Djèlí Clark’s A Dead Djinn in Cairo
• Haruki Murakami’s Super-Frog Saves Tokyo
• Alix E. Harrow’s Do Not Look Back, My Lion
• Neil Gaiman’s How To Talk To Girls At Parties
• Iori Kusano’s Next Station, Shibuya

 

Mir wëllen Texter vu Schrëftsteller*innen aus Lëtzebuerg.

Mir huelen Texter un op: Lëtzebuergesch, Englesch an Däitsch. (Leider si mir allebéid net déi stäerksten am Franséischen a kënnen dofir och net garantéieren, dass mer dat Franséischt verbessert kréien. Mir siche grad aktiv no enger Persoun, déi ass bei dësem Aspekt hëllefe kann, a bis mir déi Persoun fonnt hunn, huele mer kee Franséisch un, ausser mir sinn eis sécher, déi Persoun mécht keng Feeler).

Mir akzeptéieren Texter mat verschiddene Sproochen, soulaang et Lëtzebuergesch, Englesch, Däitsch a Franséisch ass.

Mir wëlle Fiktioun an Artikelen ënnert 2000 Wierder (fir de Moment). De Minimum läit bei 250 Wierder (Microfiction).

Mir wëlle Lyrik, déi net méi grouss ass wéi 3 Säiten (wannechgelift, follegt d’Suggestiounen am Formatéieren Deel).

Mir wëlle kloer Prosa, geschriwwen an engem gudde Stil. Fir éierlech ze sinn, si mir keng Experten an der Grammaire an hunn och keng preskriptiv Oder. Am Géigendeel, mir drécken oft en Aen zou, oder gesinn d’Feeler net wierklech, well mir dru gleewen dem Auteur seng eegen an authentesch Stëmm ze weisen. Mir hunn och eng gewësse Meenung géigeniwwer der Sprooch am verglach vun aner Editeuren. Standardiséiert Grammaire ass ni eng eent-zu-eent Spigelung vun der Sprooch. Mir wäerten dofir éischter mat eise Kommentaren op kënschtleresch Decisioune pochen, wéi elo all eenzel Sazstrukturen oder Wuert ze kommentéieren.

Awer, mir wënschen eis, dass wéinstens d’Grondreegele vun der Grammaire, op egal wéi enger Sprooch, agehale ginn.

 

𓆣

 

WAT MIR NET WËLLEN

Mir wëlle keng onfäerdeg Geschichten. Et muss schonn eng konkret Plotstruktur hunn. Mir wëlle keng Fragmentatioune vun Texter oder just Beschreiwunge vun Zeenen, ouni Bedeitung, ausser et ass Lyrik, an dann nach, och d’Lyrik soll e gewëssenen Impakt a Struktur hunn.

Wann s de net weess wou ufänken, kuck dir da villäicht dat heiten un:

• Jeff Vandermeer’s Wonderbook
• Brandon Sanderson’s Creative Writing Lectures on Youtube
• Odyssey Writing Workshop’s Writing Tips

Mir huelen net onbedéngt Horror un. Mir wëssen, dass Horror am Spektrum vun der spekulativer Fiktioun fält, mee, leider ass et och oft esou, dass et onnéideg Brutalitéit a Péng mat sech bréngt. Mir wëlle keng onnéideg Brutalitéit, lässegen Doud, oder iergendeng Verherrlechung dovunner. Mir huele keng Texter un, déi V-rgewaltegungen, Pornographie, sadistesch Gewalt, Gore, Déierenabus, Kannerabus oder offensichtleche Rassismus, genau esou wéi transphobesch, homophobesch, xenophobesch Aspekter, oder och Haassried abannen an et Haaptpunkt vun der Geschicht maachen. Mee, wann den Horror subtil an awer spannend ass, ouni déi Elementer, huele mir se villäicht un.

Mir wëlle keng Kapitalismus oder Riets, respektiv Konservativ Propaganda.

Mir wëlle keen Text dee schonn agereecht a refuséiert gouf, och wann e geännert gouf.

Mir wëlle keng Texter, déi scho verëffentlech gi sinn, aus dem einfache Grond, dass mer d’Problemer mat de Rechter vermeide wëllen.

Mir wëlle keng Clichéen. Tropes sinn OK. Jo, et gëtt en Ënnerscheed.

Mir wëlle keng Areechung vun engem Text, déi simultan och tëscht aneschters agereecht ginn ass. Mir huelen awer puer Areechunge gläichzäiteg un (awer wannechgelift net iwwerdreiwen).

Mir hu kee Problem mat Schreiffeeler — bis zu engem gewëssenen Niveau. Mir och maache Schreiffeeler, mee wann all drëtte Wuert falsch geschriwwen ass, an et ass net express esou, huele mer den Text net un. Et ass guer kee Problem e Spellchecker ze benotzen (mir maachen et jo och, zemools am Lëtzebuergeschen…)

Mir wëlle keng geklauten Texter.

An, Strange Horizon huet eng Lëscht verëffentlecht mat Plotstrukturen an Themen, déi oft genotzt ginn an déi e bëssi un Originalitéit feelen, a mir si generell mat dëser Lëscht averstanen. Wann s de deng Plotstruktur op der Lëscht erëmerkenns, sief der wannechgelift sécher, dass däin Text eppes eenzegaarteges huet. Challenge yourself! Mir appreciéieren dat!

 

𓆣

 

SPEKULATIV FIKTIOUN: ENG DEFINITIOUN

Eis Definitioun fir d’spekulativ Fiktioun passt zu dësem Zitat:

“[…] ‘Speculative fiction’, as now most often used, does not clearly define any generic boundary, it has come to include not only soft and hard sf but also Fantasy as a whole […]. [T]he term has been useful precisely because it allows the blurring of boundaries, which in turn permits a greater auctorial freedom from genre constraints and ‘rules'” (The Encyclopedia of Science Fiction).

Mir sinn domadder averstanen, dass spekulativ Fiktioun vun der Science Fiction ofstaamt, mee dass den Term vu spekulativ Fiktioun, all Genrë mat abegräift.

Awer, op engem formelle Level gleewe mir, dass d’spekulative Fiktioun en Zesummespill aus dräi Elementer ass: novum, cognition an estrangement — eng Theorie etabléiert vum kroatesche Literaturkritiker Darko Suvin. D’folgend Zitat ass eng gutt Zesummefaassung:

“By ‘cognition’ Suvin appears to mean the seeking of rational understanding, and by ‘estrangement’ something akin to Bertolt Brecht’s Verfremdungseffekt […]. Perhaps the most important part of Suvin’s definition, and the easiest with which to agree, is the emphasis he puts on what he and others have called a Novum, a new thing – some difference between the world of the fiction and what Suvin calls the “empirical environment”, the real world outside.” (The Encyclopedia of Science Fiction).

Wéi ass et da bei der Fantasy? Fantasy besteet aus änlech Elementer, en Ënnerscheed gëtt awer gemaach:

“Peter Nicholls, pointing to this particularly blurred demarcation line, argues that sf must by definition follow natural law whereas fantasy may and mostly does suspend it. Fantasy need not be susceptible to ‘natural’ or cognitive explanation; indeed, supernatural explanation is at fantasy’s heart.” (The Encyclopedia of Science Fiction).

Dat heescht, den Ënnerscheed ass, wéi eppes innerhalb vun der Geschicht existéiert; et ass Magie géint Technologie; dat Natierlecht géint dat Iwwernatierlecht. Cognition am Science Fiction Beispill referenzéiert eis Realitéit, wärend d’Cognition an der fantasy Welt eng Realitéit referenzéiert, déi an hirer Essenz am Fong iwwernatierlech ass, respektiv aner Reegelen a Gesetzer huet am Géigesaz vun eiser Welt, wat de Lieser e Gefill vu Verfriemung spiere léisst. Fir d’Figuren an der Welt do awer, ass déi Welt normal. Ausser am Genre vum Urban Fantasy, wou de Protagonist, déi iwwernatierlech Welt réischt entdeckt; e Beispill wär dem Lev Grossman seng The Magicians (2009) Rei.

Also, wärend de Novum an d’Cognition sech ënnerscheeden, bleift Estrangement, also d’Verfriemung, de Kär vun der spekulativer Fiktioun.

𓆣

 

FORMATAGE

De Formatage soll simpel a kloer sinn:

• Schrëft: Times New Roman
• Schrëftgréisst: 12
• Zeilenofstand: 1.5
• Säitenzuel: Ënne Riets.
• D’éischt Linn vun all neiem Paragraph soll erageréckelt sinn.
• Ewechhuelen vum Espace virum an no all Paragraph.
• Orientatioun: Justify (!).
• D’Deckblatt soll folgend Informatiounen hunn: Numm a Familljennumm, Adress, Telefonsnummer, E-Mail, Websäit, Titel vum Text an wéi vill Wierder.
• Dokumenttyp: DOCX oder PDF.

Dat doen ass de Minimum, also passt och dorops op, Merci!

 

𓆣

 

REDAKTIOUN

Eis Ekipp besteet aus enger Koppel, déi momentan och nach studéieren an déi dat fräiwëlleg maachen. Mir versiche jidderengem Feedback ze ginn, oder och e Kommentar z’hannerloossen, wisou mer den Text net geholl hunn, mee dat ass net ëmmer méiglech.

Wann den Text ugeholl gëtt, wäerte mer dat per Mail bescheed ginn, zesumme mat Feedback, deen natierlech och kontestéiert ka ginn.

 

𓆣

 

BEZUELUNG

Momentan kënne mir net bezuelen, aus dem einfache Grond, dass dëse Projet fräiwëlleg ass. Mir sinn net e professionelle Marché. Mat eis verëffentlechen, heescht awer, dass däin Text en Deel vun der spekulativer Fiktioun zu Lëtzebuerg gëtt. Aner Welten kann eng Plattform ginn, déi Austausch fërdert, a mir versichen och alles, fir d’Texter ze promoten.

An, natierlech, wäerten d’Rechter vum Text nach ëmmer der Schrëftsteller*in gehéieren. Mir wäerte keng Rechter kafen. Mir wëllen, dass Aner Welten accessibel ass an esou Schrëftsteller*inne frëndlech wéi et nëmme geet.

 

𓆣

 

WéI LAANG BAUCH DER?

Esou laang wéi mer brauchen. Mir wäerten net gehetzt duerch d’Texter goen. Wann mer awer ze vill Zäit huelen fir duerch en Text ze goen, an du wëlls däin Text zeréckzéien, schéck eis eng E-Mail esou: [TAKE BACK] däin Numm an de Numm vum Text.

 

𓆣

 

BEREET FIR OFZESCHéCKEN?

Super! Klick op de Knäppchen (de Logo) do ënnen a fëll de Formular aus.

(an jo, et deet eis leed, mee du brauchs eng Google Mail).

𓆣