🇬🇧 🇱🇺

WIE MIR SINN

Aner Welten ass eng online Publikatioun iwwert d’lëtzebuergesch Spekulativ Fiktioun.

Aner Welten verëffentlecht Fiktioun, Lyrik an och Artikelen, déi sech mam Thema vun der spekulativer Fiktioun befaassen, a geschriwwe gouf vu jonken, lëtzebuergesche Schrëftsteller*innen.

Aner Welten versicht domadder eng Traditioun vu spekulativer Fiktioun zu Lëtzebuerg z’erschafen.

 

𓆣

 

SPEKULATIV FIKTIOUN ZU LËTZEBUERG?

“Science fiction is a literary genre which in Luxembourg counts few follower,” esou nom Henzig, Lesch a Letsch am Hugo Gernsback: An Amazing Story; e Buch a Form vu Katalog, wat am Kader vun der Hugo Gernsback Ausstellung 2010 am Centre national de littérature verëffentlecht gouf, a se si mat dëser Ausso leider net falsch.

Obwuel et eng aktiv Communautéit gëtt zanter 1995, motivéiert vun der Science Fiction and Fantasy Society Luxembourg, déi och bekannt ass duerch hir Luxcon, ass d’Aktivitéit am Feld vun der spekulativer Fiktioun éischter moer.

Awer hunn déi lescht zwielef Joren e Wuesstem u spekulativ Fiktioun innerhalb der lëtzebuergescher Literaturzeen gewisen. Schrëftsteller*innen wéi de Claude Peiffer, Luc Francois, Jean Bürlesk, Kiara Roth, an de Maxime Weber hunn zu der lokaler Zeen mat hire Publikatioune bäigedroen.

Dobäi kënnt nach, dass d’spekulativ Fiktioun a mainstream Medien a Fiktioun ëmmer méi Fouss faasst (Marvel oder Dune) als féierende Genre an der Industrie, wat natierlech dozou féiert, dass sf (spekulativ Fiktioun, net Science Fiction) sech als populäre Genre etabléiert.

Souguer op engem internationalen Niveau, distanzéiert sech d’Meenunge vun der Iddi, dass sf Literatur net kéint mat richteger Literatur (wat och ëmmer dat ass) mathalen. Nobelpräis Gewënner*innen, wéi de Kazuo Ishiguro, oder Schrëftsteller*inne wéi d’Margaret Atwood an d’Ursula K. LeGuin representéieren dëse Wiessel an Unerkennung (och wann sech béid Schrëftsteller*innen jorelaang debattéiert hunn, wat iwwerhaapt d’Differenz tëschent Fantasy, Science Fiction a spekulativer Fiktioun ass). Et gesäit esou aus, wéi wann d’spekulativ Fiktioun, mat hire ganze Sub-Genren, erlaabt ass aus hirem “literary ghetto”, wéi LeGuin et definéiert, erauszekommen.

Et ass dofir och nëmme logesch, dass Lëtzebuerg och dësem Trend nogeet. Aner Welten wëll dëst erreechen.

Aner Welten ass eng online Publikatioun, déi sech op d’spekulativ Fiktioun zu Lëtzebuerg fokusséiert. Et ass eng Plattform, déi als Zil huet eng sf Traditioun zu Lëtzebuerg z’etabléieren. Wärend am Ausland an op engem internationalen Niveau d’Wichtegkeet vu sf an der Literatur acceptéiert gëtt, a verschidde sf Kulturen sech eng Plaz an der Weltliteratur maachen, huet Lëtzebuerg bal keng dokumentéiert sf Traditioun.

Aner Welten wëll dat änneren.

 

𓆣

 

WISOU BRéICHT LËTZEBUERG ESOU EPPES?

D’Grënnungsgeschicht vu Lëtzebuerg baséiert op der Iddi, dass d’Mamm vu Lëtzebuerg eng Mierjoffer ass.

Nationale Schrëftsteller, den Edmond de la Fontaine, huet lokal Soen a Legenden, déi virdrun just oral iwwerdroe gi sinn, a sengem Buch Luxemburger Sagen und Legenden (1882) zesummebruecht. E Buch gefëllt mat engem Kazekinnek dee schwätzt, Zauberer, Hexen, Elfen an eng gëlle Kou. Gläichzäiteg huet den Nikolaus Gredt e Joer drop säi Sagenschatz des Luxemburger Landes (1883) verëffentlecht. Rumeure soen, dass béid Schrëftsteller wossten, dass een deen aneren un deene Bicher schreiwen a si hunn sech da probéiert géigesäiteg ze sabotéieren.

Dobäi kënnt nach, dass ee vun de Symbolfiguren an der lëtzebuergescher, literarescher Traditioun e Fuuss dee schwätze kann ass.

An natierlech däerf den Hugo Gernsback, och bekannt ënnert Hugo Gernsbacher net feelen; e jonke Mënsch, deen zu Lëtzebuerg opgewuess ass, mee sech dunn op d’Rees gemaach huet, well, wéi et oft üblech ass, wann d’Passioun ee rufft an ee versicht sech en Numm ze maachen, geet een der Stëmm do no. Mat nonzéng Joer ass de jonke Gernsback an Amerika gereest, wou hien seng Karriär als Editeur an Ingenieur ugefaangen huet an eventuell den Term scientification etabléiert huet, wat spéider zu science ficiton gouf.

Dat heescht, en Deel vun der lëtzebuergescher Literaturkultur ass beaflosst duerch Wierker a Geschichten, déi hautzedaags als spekulativ Fiktioun kategoriséiert géife ginn, an trotzdeem ass d’textuell Produktioun vu sf minimal, bal net existent, am Verglach mat eisen Noperen, respektiv aner Literaturkulturen.

Dat heescht awer net, dass kee versicht hätt dat z’änneren. De Robert ‘Gollo’ Steffen, zum Beispill, ass Grënner vum Verlag Op der Lay, an hat 1979 d’Initiativ ergraff an huet eng Sammlung ënnert de Numm Der Himmel auf Erden: Science Fiction aus Luxemburg verëffentlecht, wou bekannten Nimm aus der Literaturzeen, Science Fiction Kuerzgeschichten a Gedichter an engem onkonventionellen an experimentelle Still, ënnerstrach duerch markant schwaarz-wäiss Illustratiounen, geschriwwen hunn. Et war en Experiment, dee versicht hat villäicht genau dat selwecht ze maache wat Aner Welten versicht ze maachen: eng sf Traditioun z’etabléieren, wat leider an deem Fall net geklappt huet. Et ass réischt an de Joren no 2010, wou sech e Wuesstem a Richtung vu sf kristalliséiert, gefuerdert vun de Nimm, déi Uewe schonn erwäänt goufen.

An et ass e luese Wuesstem.

Lëtzebuerg braucht en Unhaltspunkt fir sf.

 

𓆣

 

WISOU E WEBZINE?

Wuesstem heescht och Upassung. Den Internet ass eisen Alldag, et ass relevant, en Deel vun eiser moderner Existenz. Et ass villäicht souguer sf an der Essenz, an et ass natierlech praktesch, och ouni grousse Budget. Aner Welten existéiert ganz no der Iddi vum Fräiwëllegen, jo, mir si souguer villäicht eng Grassroot Beweegung am Gedanken.

Dobäi kënnt nach, dass, wa mer eis déi momentan online Publikatiounen a Magasinner ukucken, déi en Deel vum internationale Wuesstem vun der sf puschen, sinn se all, oder éischter se hunn all, eng massiv online Präsens. De Marché gëtt vun hinnen diktéiert. D’Hugo (esou eppes wéi de Pulitzer fir sf) Gewënner stamen all aus Publikatioune wéi Tor.com, Strange Horizon, Uncanny Magazine, Beneath Ceaseless Skies, Clarkesworld an esou weider…

Also ass et jo nëmme logesch, déi Grouss z’imitéieren.

𓆣

 

WIEN ASS DEN TEAM?

Aner Welten besteet momentan aus zwee Memberen. Aner Welten ass Projet a Kand vum Cosimo Suglia, mee seng super Frëndin, Sandy Heep, hëlleft him beim editéieren, an hatt verbessert dat Däitscht vum Cosimo an dat vun anere Leit.

Cosimo (he / him) as e jonken Auteur — siwenanzwanzeg Joer alen, tattoowéierte Student — dee sf gäre huet a genau esou gäre Feedback gëtt. Hien huet Englesch (Bachelor) a Lëtzebuergesch (Master) studéiert. Hie seet heiansdo Saache virun sech hin an d’Leit laachen, ganz no senger Verwonnerung.

Sandy (she / her) — net Sally, net Candy, an och net Sandra — ass e Fantasy a sf Enthusiast säit klengem un. Liesen, kommentéieren an Kritik ginn ouni dass iergendeen gefrot huet, ass säin Hobby, genau esou wéi och d’Luxcon ze plangen. Hatt mécht am Moment e Master op der Universitéit zu Lëtzebuerg mat engem Numm esou laang, et bréicht e ganze Paragraph vir sech selwer. Mat sengem Ego an dem Cosimo sengem Talent (dem Sandy seng Wierder), sinn se en zimmlech gudden Team.

Allebéid maachen dëse Projet fräiwëlleg, ouni finanziell Hëllef am Moment.

Et ass och deen éischte literareschen an editorielle Projet deen si zesumme maachen.

 

𓆣

 

KANN EEN IECH KONTAKTéIEREN?

Kloer, schéckt eis eng e-mail un: info@anerwelten.lu

Benotzt déi e-mail wannechgelift net fir d’Areeche vun Texter. Ënnert der Submit Säit kënnt der dat maachen, nodeems der d’Instruktioune gelies hutt, Merci!

Mir si generell net oppe fir Reklammen, ausser mir si wierklech iwwerzeegt vum Produit an maachen et aus eiser eegener Iwwerzeegung.

𓆣

 

ANER INFORMATIOUNEN

D’Konscht op der Websäit ass public domain a mir kënnen et dofir benotze wéi mer et wëllen. Trotzdeem gleewe mer dorun, dass Kënschtler Unerkennung sollte kréien (och wann se verstuerwe sinn). Déi benotzte Biller kann een hei fannen: artvee.com